ILOILO CITY— Naghiwat sang rally ang pila ka mga progresibo nga grupo agud ipakita ang supporta kay Commission on Elections (COMELEC) –Commissioner Rowena Guanzon.
Sa interview sang Radyo Bandera Iloilo kay Brayan Bosque, Deputy Spokesperson sang Bayan Panay, ginpahayag sini nga upod ang Bagong Alyansang Makabayan naghiwat sila sang sympathy protest action bilang pagpakita sang suporta kay Commissioner Guanzon nga nagboto sa disqualification case ni Bongbong Marcos.
Dugang pa sini, dapat ma-release na sang Comelec-Central Office ang desisyon antes magretiro si Guanzon.
Nag-apelar man ini sa pumuluyo nga indi liwat paghatagan sang poder ang pamilya Marcos bangud sa natabo nga Martial Law sang tuig 1972.
Samtang sa interview naman kay Lucy Francisco, Chairperson sang Gabriela Panay- Guimaras, ginpahayag sini nga may basehan si Guanzon antes ini naghatag sang iya desisyon.
Ginpakigbahin pa sini nga isa sa mga basehan ni Guanzon amo ang kaso ni Marcos sa Bureau of Internal Revenue sa diin wala ini nagbayad sang husto nga buwis.
Nagpasalig ini nga bukas ang talatapan sa mga reklamo kag handa man sila nga magbulig sa mga indibiwal nga nagakinahanglan sang serbisyo legal.
