ILOILO CITY — Ginkumpirmar ni Boulevard, Molo Punong Barangay Virgilio Villanueva nga wala sang record sang pagbaligya sang bata ang residente sini nga si Ana Agustin.
Madumduman nga kahapon, ginpatigayon sang Criminal Investigation and Detection Group (CIDG) ang entrapment operation batok kay Agustin kag sa iloy nga si Edelyn Pendon nga gina-alegar tuyo ibaligya ang lima ka adlaw nga lapsag.
Sa interview sang Radyo Bandera Iloilo kay Villanueva, ginpahayag sini nga sa ila pagkakilala kay Agustin, kumadrona ini kag nagapang-manicure.
Dugang pa ni Villanueva nga nakibot nalang siya kahapon nga nagkadto sa iya ang katapo sang CIDG kag ginpamangkot siya kun may ihibalo bala ini nga may nagabaligya sang bata sa iya barangay.
Gin-agda ini nga mangin witness, kag nagpadulong sila sa balay ni Agustin.
Didto ila naabtan nga may yara gid man sang lapsag, kag nakita sa cellphone sini ang madamo nga transaksyon sa kun sin-o ang luyag magbakal sang bata.
Apang suno sa punong barangay, ginapanginwala ni Agustin kag ni Pendon nga tuyo nila ibaligya ang lapsag, sa baylo ila ginpanindugan nga ipa-adopt lang nila ini.
