ILOILO CITY — Nagapangabay si National Telecommunications Commission (NTC) 6 Regional Director Engr. Leah dela Cruz Doromal nga magpa-rehistro na sa mas madali nga panahon sugod subong nga adlaw, Disyembre 27, sang SIM card kadungan sang pagsugod sang implementasyon sang SIM Card Registration Act.
Sa exclusive interview sang Radyo Bandera Iloilo kay Doromal, ginalauman sini nga madamo ang mapa-rehistro subong nga adlaw, kag indi na maghulat nga matapos ang 180 days.
Suno sa iya, sarang magkadto sa mga online portal sang kada telco agud magpa-register:
Para sa DITO Telecommunity Corp. users: https://dito.ph/registerDITO
Globe Telecom Inc. users: https://new.globe.com.ph/simreg
Smart users: https://smart.com.ph/simreg
Sa mga wala naman sang access sa internet, nakasaad sa Implementing Rules and Regulation (IRR) sang amu nga layi nga maga-provide ang mga telco sang registration facility sa mga remote areas.
Nahibaluan nga kun indi makaparehistro sa sulod sang 180 days, ma-deactivate ang existing SIM card, pero suno kay Doromal, posible nga ma-extend pa ini sang tubtob 120 days (case-to-case basis) kag kun mapaslawan nga makaparehistro, maga-resulta ini sang automatic deactivation.
Hatagan naman sang kahigayunan nga makapa-reactivate sa sulod sang lima ka adlaw ang mga end-users.
Nagpanugyan naman si Doromal nga magbakal lang sang SIM card sa mga accredited resellers.
