ILOILO CITY— Posible nga isuspende ang operasyon sang Amnesia Resort sa banwa sang Oton, Iloilo bangud sa paglapas sa ginpatuman nga protocol sang probinsya kaangay sang pagserbe sang makahulubog nga ilimnon, mga nagtambong nga wala nagsuksuk sang facemask kag ang pagpatigayon sang mass gathering.
Sa interview sang Radyo Bandera Iloilo kay Gov. Arthur Defensor Jr, ginpahayag sini nga dapat mangin istrikto ang pag-implementar sang protocols kag obligado ang tanan nga mga establisyemento nga magsunod sa pagsulundan.
Nahibaluan nga sandig sa Executive order number 02-B kag base man sa gin-amyendahan nga section7 sang executive order number 040, hugot nga ginadumulian ang pagserbe sang makahulubog nga ilimnon lakip na ang public consumption.
Wala man ginapahanugutan ang pag-inom sa bars, kiosk, restaurant kag iban pa nga kalan-an sa probinsya.
Madumduman nga nagbukas ang Amnesia Resort subong lang nga Pebrero kag gilayon ini nga gindugok sa mga pumuluyo bangud wala sang entrance fee kag magluwas diri may yara sang Dj kag pool party.
Sa karun, ginahulat pa ang opsiyal nga pahayag sang Oton Municipal Police Station kag lokal nga pamunuan sang nasambit nga banwa.
