ILOILO CITY—Nagdangat sa P1.4 million balor sang iligal nga druga ang narekober sang City Drug Enforcement Unit (CDEU) sa ila operasyon nga ginpatigayon sa Zone 15, Brgy. Calaparan, Arevalo, las 11:40 sang gab-i, Marso 14 Martes.
Ginkilala ang suspek sa kay Gemar “Jao” Gevero 35 anyos, residente sang Zone 2, Brgy. San Juan Molo kag nagarenta sa Zone 15, Brgy. Calaparan, Arevalo.
Sa interview sang Radyo Bandera IloIlo kay Police Lieutenant Colonel Antonio Benitez Jr. Chief sang CDEU, malapit sa tatlo ka semana ang monitoring antes pa ang madinalag-on nga operasyon.
Dugang pa ni Benitez, nagahalin sa New Bilibid Prison ang ginabaligya nga druga ni Gevero.
Pahayag pa sang hepe, napreso man sadto si “Jao” sa amo man nga kaso sang tinalikdan nga tuig 2015 kag nakaguwa ini sang tuig 2022.
Una ginpatigayon ang drug buy-bust operation sa suspek kag nabaklan ini sang isa ka bulto nga sachet gamit ang P15,000 bilang drugbust money.
Nakuhaan pa gid dugang sa paghinakop sini ang apat pa ka bulto nga sachet sang druga.
Pagkatapos sini nagserbe sang search warrant ang CDEU nga gina-address sa hulot sang subject sa diin diri ini nagarenta upod sa iya live-partner.
Sang ginlighot na ang nasambit nga lugar, may narekober nga 16 ka bulto sang mga sachet sang druga nga nasulod sa pouch nga itom.
Sa padayon pa gid nga paghusisa may nasapwan pa gid dugang nga 20 ka mga bulto sang druga.
May yara tanan 41 ka mga bulto ang narekober nga may kabug-aton 200 gramos kag may estimated market value nga P1.4 million.
Todo panginwala ang suspek, apang ang tanan naga-agi sa maid-id nga monitoring kag covered sang body worn camera.
Hunong na sa Arevalo PNP ang suspek kag magapangatubang sang kaso sa paglapas sa Republic Act 9165 ukon ang Comprehensive Dangerous Drugs Act Of 2002.
