Ginpangunahan ni Iloilo Police Provincial Director Police Colonel Ronaldo Palomo ang paglunsyar sang MotorondaSquad: “Ilonggo Motor cops Anti-Street Crime and Emergency Response” sa Camp Zerrudo, 2nd Iloilo Police Mobile Force Company Headquarters, Brgy. Zerrudo, Sara, kahapon, Marso 18.
Sa interview sang Radyo Bandera Iloilo kay Police Major Rolando Araño, Spokesperson sang IPPO, ang MotorondaSquad ang nagakahulugang sang: motor-motorcycle, ronda-patrolling kag squad-grupo.
Suno kay PMaj. Araño, ini ang inisyatibo ni IPPO Director PCol. Palomo nga may tinutuyo nga matapna ang mga krimen sa dalanon kag gilayon nga aksyon sa posible nga krimen; mapataas ang visibility sang kapulisan sa mga emergency situation; mangin kabahin ang emergency response team; kag mangin safe kag secured ang komunidad.
Ginpahayag man sang opisyal, may ipahamtang nga isa ka team sa kada distrito nga ginbug-usan sang anum tubtob walo ka miyembro sa pagpanguna sang ila course commander sang mobile force company kag may gina-isyu sa ila nga radio communicator agud nga mapadasig ang pagrelay sang impormasyon kag matapna ang mga ‘prevalent crimes’.
Mahimo man nga ma-augment ang nasambit nga grupo sa mga okasyon ukon event.
Trabaho naman sang mga medical responders nga maghatag sang impormasyon sa emergency response unit sang banwa.
Gina-abi-abi man sang ahensya ang tanan nga magabulig kag nagahingyu man sa mga local government units sang dugang nga motorsiklo agud mapabaskog pa gid ang programa sang kapulisan.
Dugang pa sini nga makabulig man sa mga on-the-spot response ang nasambit nga team samtang sila nagapatigayon sang pag-patrolya.
