ILOILO CITY — Gin-athag ni Rizal Pala-Pala 2, City Proper Punong Barangay Noel Soliman nga indi niya mga residente ang mga pamatan-on nga involve sa rumble sa Diversion Road, Mandurriao sang nagligad nga Enero 15 sang kaagahon.
Madumduman nga naglabay ang Ford nga pick-up sakay ang tatlo ka pamatan-on sa Diversion Road nga padulong ang direksyon sa downtown, sang hinali lang naglagabong ang likod sang salakyan, kag ila nakita ang 15 ka pamatan-on nga lalaki nga nagasinggitan.
Ginbalikan sang mga naka-salakyan ang 15 ka pamatan-on kag ginkompronta tubtob nga nag-init ang ila pagbinaisay nga nagtuga sang rambol.
Sa interview sang Radyo Bandera Iloilo kay Soliman, ginpahayag sini nga wala siya sang residente nga na-identify sa rambol.
Dugang pa niya nga nagapatigayon sila sang sports sa barangay kag gina-imbitar ang mga taga Barangay Estanzuela kag Rizal Pala-pala 1 agud nga ma-divert sa hinampang ang atensyon sang mga pamatan-on.
Dugang pa ni Soliman nga ang mga kabataan karon sa ila barangay ang naga-intra sa mga tribu para sa Ati Tribe Competition sa Dinagyang Festival.
