ILOILO CITY — Wala gina-tolerar sang Philippine Army ang natabo nga pagpangtiro ni Army Staff Sgt. Razel Palomar nga nagresulta sang pagkapatay sang isa ka persona kag pagkapilas sang tatlo ka iban pa sa Barangay Aglalana, Passi City sang Nobyembre 26.
Sa interview sang Radyo Bandera Iloilo kay Army Capt. Roel Maglalang, tagpamaba sang 301st Infantry Brigade, 3rd Infantry Division sang Philippine Army, ginpahayag sini nga ginatugyan nila sa karon si Palomar sa Philippine National Police para sa imbestigasyon, apang nagapatigayon man sila sang kaugalingon nga pag-usisa sa natabo nga insidente.
Suno kay Maglalang, wala man nila ginadula ang posibilidad nga self-defense ang ginhimo ni Palomar.
Sa karon, indi pa sila makatul-id kun ano ang matabo sa nasambit nga suldado bangud nagapadayon pa ang imbestigasyon, kag magadepende sa proseso sang Philippine Army kun ma-demote ukon ma-discharge ini sa serbisyo depende sa resulta sang imbestigasyon.
Pananglitan nga makapyansa si Palomar, ipaidalum man siya sa psychosocial intervention agud mahibaluan kun ano ang nangin epekto sa iya sang natabo nga insidente.
