ILOILO CITY— Nagapanghanda na ang Police Regional Office-VI sa palaabuton nga eleksyon sa Mayo 9, 2022.
Sa interview ni Kabanderang John Sapio kay PLt. Col. Arnel Solis, spokesperson sang PRO-VI sa programa 11 MBPS, ginpahayag sini nga iga-deploy ang kapulisan sa nagkalain-lain nga lugar sa Western Visayas agud nga mag-monitor sang sitwasyon kag nagakatabo sa palaabuton nga pinili-ay.
Suno kay Solis, wala pa sang may narekord nga insidente may kaangtanan sa eleksyon gani makabig pa ini nga generally peaceful apang indi dapat mangin kampante ang publiko.
Dugang pa niya, padayon nila nga ginamonitor ang posible pagtuhaw sang mga armado nga grupo nga may yara sang malain nga tinutuyo sa tion sang eleksyon.
Ginpakigbahin pa sini nga may yara sang 44 ka mga lugar sa Western Visayas nga ginpaidalum sa areas of concern, apat diri ang yara sa yellow list, 35 sa orange kag lima ang nalakip sa red list.
Nagpanugyan ini sa publiko nga mangin maaligmat sa palibot agud malikawan ang ano man nga insidente.
Nagpangabay si Solis sang malinong kag matawhay nga pinili-ay sa Mayo 9, 2022.
