Gin-athag ni Guimaras Vice Gov. John Eduardo Gando nga wala naga-require ang provincial government sang booster vaccination para makasulod sa isla.
Sa exclusive interview sang Radyo Bandera Iloilo kay Vice Gov. Gando, ginpahayag sini gina-required lang nila nga makasulod sa probinsya ang mga fully vaccinated.
Wala naman sang iban pa nga requirement nga gindugang si Governor Samuel Gumarin, suno sa iya.
Samtang, ginpahayag man sang bise gobernador nga indi pag-pahanugotan ang mga residente sang Guimaras nga makagwa sa isla magluwas lang kun may emergency referrals.
Suno kay Gando, mahimo nga magpakita sang proof ang isa ka persona kun may importante ini nga kadtoan ilabi na kun magtabok sa syudad sang Iloilo kaangay sa pag-check up.
Indi naman pwede suno sa iya nga magwa sa Guimaras para lang maglagaw.
Mahibaluan nga may yara pa sang 130 active cases sang CoVid-19 kag 1 Omicron case ang probinsya sang Guimaras.
