ILOILO CITY — Natalana nga magretiro sa serbisyo bilang katapo sang Philippine Army si Technical Sergeant Ken Camilan sang Brgy. Buntalan, Leon sa masunod nga tuig apang napatay ini sa nagluntad nga ambush sang Nobyembre 22 sa Brgy. Camindangan, Sipalay City, Negros Occidental.
Sa exclusive interview sang Radyo Bandera Iloilo kay Nanay Leticia Camilan, iloy sang 41-anyos nga si Camilan, 19 na ini ka tuig sa serbisyo kun sa diin na-assign siya sa karon sa 47IB 31D PA.
Nagpabutyag ini nga kun maglab-ot siya sa 20 ka tuig nga serbisyo magapahuway na ini agud matutukan ang iya pamilya.
Indi man sila gihapon makapati bangud hinali ang iya kamatayon kag wala ini nakapamilin-bilin sa iya asawa kag duha ka kabataan nga nagahulat pa kuntani sa iya pagpuli.
