ILOILO CITY — Sa halos duha ka tuig nga wala sang klase bangud sa COVID-19 pandemic, liwat nga nagpatigayon sang face-to-face classes ang Tabucan Elementary School sa distrito sang Mandurriao.
Sa interview sang Radyo Bandera Iloilo kay Marilyn Nequinto, Head Teacher 3 sang nasambitan nga buluthuan, iya ginpahayag nga nag-umpisa subong nga adlaw, Mayo 16, sang face-to-face classes.
May duha pa gid ka mga eskwelahan ang ginpahanugutan man nga magbukas subong nga adlaw, ini amu ang Don Pison Memorial School kag Navais Vorres sa Mandurriao.
Masobra man binulan ang ila nga preparasyon agud matigayon ang nasambit nga face-to-face claases.
Pahayag sang manunudlo nga gin-seperar sa duha ka set ang mga estudyante, ini amo ang set A kag set B.
Isa ka semana nga magasulod sa eskwelahan ang una nga set sang mga kabataan kag sa sunod naman nga semana magasulod ang isa ka set.
Dugang pa sang natungdan may ara nga 186 ka mga learners sa isa lamang ka set.
Nagpanugyan naman ang natungdan nga hatagan sang importansya ang buluthuan kag sa mga ginikanan nga suportaran ang ila nga mga kabataan.
