Top 2 sa nursing exam nga taga-West Visayas State University, dedikasyon ang nangin armas agud mangin topnotcher; WVSU, may 19 ka Topnotchers sa subong nga pasinawan

ILOILO CITY – Liwat nga nagdala sang bugal sa syudad sang Iloilo ang West Visayas State University matapos nakakuha sang 100% passing rate sa Philippine Nursing Licensure Examination (PNLE) sa subong nga tuig sa diin 19 ka mga nursing graduates nila ang sulod sa Top 10.

Isa sa mga estudyante nila ang Top 2 sa pasinawan nga si Jezrel Cabasis Alijid sa diin may yara sya sang 89.80% nga rating.

Sa eklusibo nga interview sang Radyo Bandera Iloilo kay Alijid nga taga-syudad sang Bacolod, ginpahayag sini nga tuman ang iya kalipay bangud nabaylohan sang manami nga resulta ang iya pulaw-bugtaw para lang makatuon.

Ang iya paghimakas ang kabaylo man sa pag-paeskwela sa iya sang iya nga Nanay nga nagatrabaho sa isa ka BPO company sa Manila, Lola nya nga anay OFW, kag bilang isa man ka scholar sang Alumni sang College of Nursing sang WVSU humalin sang 3^rd college tubtob 4^th year college ini.

Nangin inspirasyon man ni Alijid ang iya amay nga nagtaliwan na sadtong Grade 7 pa lang sya bangud sa sakit nga liver cirrhosis rason nga nag-pursige ini nga mangin nursing.

Dugang man sini nga mabudlay sa mga tawo nga may terminal disease kun wala sang may nagatatap sa ila sang husto.

Ginsaysay man ni Alijid nga bisan pa may kakulang sila sa pinansyal kag mahal ang galastoson sa iya kurso nga napili, nagtinguha sya sa gihapon nga makatapos sa pag-eskwela kag makatibawas sa tanan nga galastohon, ilabi na nga sya ang subang sa ila nga lima ka mag-ululutod.

Samtang, nahibaluan nga 19 ka graduates sang West Visayas State University ang topnotchers sa diin isa diri ang Top 3; apat ang Top 4; tatlo ang Top 6; duha ang Top 7; lima ang Top 8; kag tatlo ang Top 10. Kag 134 diri ka iban pa ang nakapasar man sa nasambit nga pasinawan.