ILOILO CITY— Pagatutukan ni Atty. Sedfrey Cabaluna ang urban poor, pagbulig sa mga kabataan kag pagpasanyog sang turismo kun mahatagan sang kahigayunan nga mangin konsehal sa syudad sang Iloilo.
Sa exclusive interview ni Kabanderang John Sapio kay Atty. Cabaluna sa programa 11 MBPS, ginpahayag sini nga sang naglibot siya sa syudad, iya nakit-an ang mga problema nga kinahanglan hatagan sang igtalupangod kag atensyon.
Suno kay Cabaluna, luyag niya nga pabaskugon ang opisina sang Public Attorney’s Office (PAO) agud madamo ang ma-cater nga concern sang mga pumuluyo sa syudad.
Pagahatagan man niya sang atensyon ang mga kabataan kag luyag niya nga magpatigayon sang workshops agud nga mahanas pa gid ang ila abilidad kag mapalayo sa bisyo.
Ginpakigbahin sini nga tuman gid nga naapektuhan ang turismo sang nagsugod ang pandemya gani nakipagsapol siya sa tourism sector agud nga tinguhaan nga mabalik ang turismo sa syudad sang Iloilo.
Pila lang ini sa mga programa nga iya pagatutukan kun mahatagan sang kahigayunan nga makapungko kag maka-serbisyo sa mga Ilonggo.
Samtang ginkalipay sini ang pag-endorso sa iya sang Iglesia ni Cristo gani ginpasiguro niya nga ihatag ang maayo nga pag-alagad sa mga pumuluyo.
Nagpanugyan si Atty. Sedfrey sa publiko nga suportahan siya sa palaabuton nga Mayo 9.
