Nagapamalabag man sang una ang kalabanan sa mga drivers kag operators sa modernization program sa transportasyon sang gobyerno apang nagkooperar na lang sila sa ulihi.
Ini ang ginpahayag ni Boyet Parcon, Chairman sang Western Visayas Transport Cooperative (WVTC) Chairman sa interview sang Radyo Bandera Iloilo.
Suno kay Parcon nga sang una, makabenepisyo direkta ang mga operators sa income nga nabaton sa pagbiyahe sang traditional jeepney, sila ang nagabayad sang arkila, naga-maintenance sang salakyan kag may control sa pagbiyahe.
Dugang pa niya, sa pagpatuman sang modernization program sang gobyerno, kinahanglan nga magpa miyembro sang operators agud makasulod sa kooperatiba ilabi na kun wala sila kwarta ukon ikasarang sa pagbakal sang isa ka modernized unit nga nagabalor sang ₱2.4 million.
Kinahanglan man nga mabayad pa sang financial capacity nga ₱20,000, may processing fee sa consolidation kag sa pagpamiyembro kag balayran sa pagproseso sa Land Transportation Office (LTO) kag sa Campo Delgado.
Ginpahayag pa niya nga sa una sa traditional jeepneys, makuha ka lang sang prangkisa kag ipa-repair lang antes i-biyahe.
