ILOILO CITY- Naglab-ot sa 10 ka tawo ang ginreport nga napatay tuga sang epekto sang low pressure area ukon LPA nga naga-apekto sa pungsod humalin sang Enero 2 suno sa Office of Civil Defense ukon OCD.
Base sa pinakaulihi nga disaster bulletin sang OCD, naglab-ot na sa 291,826 ka tawo ukon 69,308 ka pamilya ang naapektuhan sang LPA sa Calabarzon, Mimaropa, Bicol Region, Western Visayas, Eastern Visayas, Northern Mindanao, Davao Region kag Bangsamoro Autonomous Region in Muslim Mindanao.
Samtang naglab-ot man sa kabug-usan nga P11,931,324 nga balor sang assistance ang nahatag na sa mga individual nga apektado sang malain nga panahon.
Nakarecord man ang OCD sang P153,066,260 nga balor sang kahalitan sa imprastruktura kag P111,738,324 nga kahalitan sa agrikultura.
Nagtuga man sang kahalitan ang LPA sa 487 ka mga pamalay.
