Nag-deklarar sang state of calamity ang provincial government sang Abra bangud sa tuman nga halit nga ginbilin sang magnitude 7 nga linog sa Northern Luzon, partikular na sa Tayum sa nasambit nga probinsya.
Nahibaluan nga ang deklarasyon ang base sa ginpasar nga Sangguniang Panlalawigan (SP) Resolution No. 180 series of 2022.
Ini agud mahatag gilayon ang tanan nga kinahanglanon sang mga Abrenios kag maka-request sang immediate assistance sa mga National Government Agencies kaangat sang relief, rehabilitation, kag reconstruction support.
Nahibaluan nga apat ka persona ang patay samtang 131 naman ang pilason kasunod sa pagtay-og sang magnitude 7 nga linog pasado las-8:00 sang aga, Hulyo 27.
Nagdangat naman sa ₱33.8 billion ang balor sang halit nga ginbilin sang linog sa imprastraktura sa Northern Luzon.
