ILOILO CITY- Napamatud-an sang Sandiganbayan nga guilty si anay Maguindanao governor Sajid Ampatuan sa mga kaso nga walo ka counts sang graft kag walo ka counts sang falsification of public documents nga naga-imbolbar sang P20 million nga balor sang ghost projects nga ginalakipan sang mga dalan.
Kadungan sini, ginmandu sang Sandiganbayan Fifth Division nga ginapamunuan ni Associate Justice Mary Ann Corpuz Mañalac ang pag-aresto kay Ampatuan bangud wala ini makatambung sa promulgation.
Ginmanduan man sang anti-graft court si Ampatuan nga bayaran ang Maguindanao provincial government sang P22 million bilang danyos bangud sa iya conviction sa multi-graft case.
Gnmanduan dugang si Ampatuan nga magbayad sang P5,000 nga multa para sa tagsa ka conviction sa kaso nga falsification of public documents.
Ginpahayag naman sang abogado ni Ampatuan nga si Atty. Manuel Castro nga i-apelar nila ang nasambit nga desisyon sang Sandiganbayan.
