ILOILO CITY- Iga-todo na sang gobyerno ang ila anti-illegal drugs advocacy program sa ginlunsar sini nga BIDA ukon Buhay ay Ingatan, Droga’y Ayawan, nga mas ginpabaskog kag holistic nga kampanya batuk sa illegal nga druga sa pungsod.
Sa idalum sang BIDA Program, magapakig-kooperar ang mga local government units ukon LGU’s, national government agencies kag iban pa nga nagapanguna nga sektor sang sosyedad, sa mga drug enforcement agencies kalakip ang Philippine National Police, Philippine Drug Enforcement Agency, National Bureau of Investigation kag iban pa nga ahensya, agud mabuhinan ang demand sa illegal nga druga kag makaangkon sang rehabilitasyon sa mga komunidad.
Ginhiwat ang national launching sang programa sa Quezon Memorial Circle sa pagpanguna ni Department of Interior and Local Government Secretary Benjamin “Benhur” Abalos nga nagsiling nga ang problema sa illegal nga druga ang dapat solusyunan halin sa ugat sini.
Ginpahayag pa ni Abalos nga ang BIDA program ang maga-koordinar sa mga barangay, simbahan kag religious communities kag mga pamilya agud masolusyunan ang problema sa illegal nga druga kag mapaidalum sa rehabilitasyon ang mga tawo nga nalulong diri.
Suno sa iya nga ang DSWD kag DOH ang magabulig sa ila rehabilitation programs samtang ang mga church leaders naman ang mahimo maghatag sang giya sa mga drug addicts kag drug pushers nga luyag magbag-o sang kabuhi.
Ang DTI naman ang ginalauman nga magahatag sang livelihood program sa ila samtang ang DOLE naman ang magabulig agud makakita sila sang trabaho.
