ILOILO CITY- Ginauyatan na karon sang Philippine National Police ukon PNP ang passbook sang self-confessed gunman nga si Joel Escorial kon sa diin kumpirmado nga may nagdeposito sa bank account sini sang P550,000 bilang bayad sa pagpatay sa broadcaster nga si Percival Mabasa alyas Percy Lapid.
Ginpahayag ni Southern Police District Director Brigadier General Kirby Kraft nga nasaad sa bank statements nga may lima ka deposit transactions humalin Setyembre 15 tubtub Oktubre 4 nga nagabalor sang P550,000.
Naguwa sa extrajudicial confession ni Escorial nga ginkontak siya ni Crisanto Villamor nga inmate gikan sa New Bilibid Prison kag nagserbe nga middleman sa pagpatay kay Lapid sadtong Setytembre 15 agud ipahibalo nga nadeposito na ang downpayment nga P100,000 sa iya bank account.
Ginsundan pa gid ini sang P100,000 pagka-aga, Setyembre 16.
Makita man sa passbook ni Escorial nga may 20 ini ka withdrawal transactions nga tag-10,000 humalin Setyemb re 15 tubtub Setyembre 29.
Sadtong Oktubre 4, isa ka adlaw matapos napatay si Lapid, gindeposito na ang P350,000 sa account ni Escorial kon sa diin P200,000 ang gin-withdraw sini sa sina man nga adlaw kag P170,000 naman ang pinakaulihi sini nga gin-withdraw sadtong Oktubre 11 sa passbook ni Escorial.
Ginpahayag ni Kraft nga sige-sige ang ila imbestigasyon kag indi mag-untat tubtub indi matumod ang mastermind apesar ginakonsiderar nila nga solbar na ini.
