Gin-depensahan sang Bureau of Immigration (BI) ang istrikto kag malawig nila nga mga palamangkotanon sa mga biyahero nga nagagwa sa pungsod Pilipinas.
Suno kay Immigration spokesperson Dana Sandoval, dako na ang pinabag-o sang landscape sang human trafficking bangud may mga professionals na nga may manami nga trabaho sa Pilipinas ang gina-recruit.
Kag kadam-an sa mga gina-recruit ang gikan pa sa mga may sarang nga pamilya kag naggradwar sa mga prestihiyoso nga buluthuan.
Base sa datos sang Immigration, may 50,509 ka Pilipino ang magabiyahe kuntani apang wala nadayon sadtong tuig 2022.
Sa nasambit nga numero, kapin 26,000 ang kulang ang dokumento, kag 392 ang posible kaso sang human trafficking.
Ginpahayag naman ni Sandoval nga dapat dal-on sang mga biyahero ang ila passport, visa kun kinahanglanon, roundtrip ticket, kag mga supporting documents.
Kun makitaan naman sang inconsistencies sa mga sabat ang pasahero, igasalang ang mga ini sa second interview.
Apang, gin-athag man sang Immigration nga indi dapat magresulta nga mabayaan sa biyahe ang mga pasahero bangud sa ma-id id nga palamangkotanon sang ila personnel.
