ILOILO CITY — Gin-sponsor na sa plenaryo sang Senado ang Committee Report 25 nga nagatalakay sa mataas nga presyo sang bombay.
Sa iya nga sponsorship speech, ginpahayag ni Senate Committee on Agriculture, Food and Agrarian Reform Chairman Senator Cynthia Villar nga Oktubre 2022 nagsugod nga magtaas ang presyo sang bombay nga nagdangat sa P750 kada kilo sadtong Disyembre.
Nagagwa man sa hearing nga ang mga bombay nga ginbaligya sang P700 tubtob P750 kada kilo ang ginbakal sa mga mangunguma sa Occidental Mindoro sa balor nga P8 tubtob P15 kada kilo sadto pang Abril 2022.
Samtang ang mga mangunguma naman sa Pangasinan kag Nueva Ecija ang napahayag nga ang ila farmgate sadtong Disyembre 2022 ang yara sa P200 tubtob P250.
Nagagwa man sa hearing nga ang mga cold storage facilities ang ginagamit sang mga trader.
Lakip man sa mga rekomendasyon sang komite amu ang pagtukod sang “Anti-Agricultural Smuggling Task Force” nga magatutok sa bilog nga sektor sang agrikultura.
Agud masuportahan ini, magabutang sang Special Court ukon Anti-Agricultural Smuggling Court nga maga-usisa sa economic sabotage cases kag may yara man sang Special Team of Prosecutors.
