ILOILO CITY- Nagpamalibad si Negros Oriental Congressman Arnolfo Teves sa pagbalik sa pungsod bangud nagakabalaka ini sa iya seguridad kag sang iya pamilya.
Ini ang pahayag ni House Speaker Martin Romualdez matapos maka-istorya sa telepono si Teves nga didto karon sa Amerika.
Suno kay Romualdez nga nagtawag sa iya si Teves sang nakaligad nga gab-i gikan sa wala mahibaluan nga lokasyon.
Una diri, ginpanawagan ni Romualdez si Teves nga magbalik na sa trabaho matapos nag-expire na sang Marso 9 ang authority to travel nga ginhatag sa iya sang kamara kag ginpasalig nga mahatagan ini sang seguridad sang kapulisan.
Gina-angut si Teves sa pagpatay kay Negros Oriental Governor Roel Degamo sang Marso 4 kon sa diin nalamita ang walo pa ka iban.
Mabaskog naman nga ginapanginwala ni Teves nga may kahilabtanan siya sa krimen.
Ginahaylo sa gihapon ni Romualdez si Teves nga magpauli kag atubangon ang mga kaso batuk sa iya.
