ILOILO CITY — Ginakahangaw-an karon ang itlog nga magadugang sa mga may mataas nga presyo nga food commodity sa idalum sang Marcos administration.
Base sa price monitoring report sang Department of Agriculture (DA), ang selling price sang single, medium-sized nga itlog sa mga merkado sa Metro Manila ang yara sa P6.90 tubtob P8.70, mas mataas sa P5 tubtob P6.50 kada isa sadtong nakaligad nga tuig sa kapareho nga period.
Agud masabat ang ini nga sitwasyon, liwat nga ginsapol sang DA ang Price and Volume Watch Committee and Advisory Groups for Livestock and Poultry agud nga imonitor ang presyo sang itlog sa bug-os nga pungsod.
Suno kay Gregorio San Diego, pinuno sang United Broilers Raisers Association (Ubra), nagapanghakroy karon ang mga egg farmers bangud sa mahal nga gasto sa produksyon.
Paathag sini, ang bili sang feeds pa lang ang kapin P5 na sa selling price sang kada itlog.
Suno naman kay Ubra president Elias Jose Inciong, apisar nga gina-welcome nila ang tikang sang DA nga buhion liwat ang price kag volume watch, apang mas makabulig kun ma-involve man ang iban pa nga ahensya kaangay sang National Economic and Development Authority, Philippine Statistics Authority, Department of Finance and Bureau of Customs para sa “complete consultative arrangement.”
Nahibaluan nga sa una nga anum ka bulan sang Marcos administration, duha n aka mga major commodities nga nalakipan sang kalamay kag bombay ang nagsaka ang presyo.
