ILOILO CITY- Ginpahayag karon sang Department of Agriculture nga magahatag ini sang fertilizer vouchers para sa mga pigado nga mangunguma agud mapasanyog ang produksyon sang humay.
Base sa memorandum Order number 65 series of 2022, nasaad diri nga ang fertilizer voucher pagagamiton sang mga farmer-beneficiaries sa pagbakal sang urea fertilizer agud masiguro nga mangin maayo ang produksyon sang humay suno kay Senior Undersecretary Domingo Panganiban.
Ginpahayag man nga ang proyekto magasakop sa mga benepisyaryo nga mga mangunguma sa mga rehiyon nga nagatanum sang inbred kag hybrid rice seeds magluwas lamang sa National Capital Region kag Bangsamoro Autonomous Region of Muslim Mindanao.
Ginhatagan pagtamod sang DA nga pagahatagan sang prioridad ang mga mangunguma nga nagatalauma sang duha ka ektarya panubo.
