ILOILO CITY— Ginmanduan sang Department of the Interior and Local Government (DILG) ang tagsa ka LGU nga mag-sumiter sang listahan sang tricycle drivers nga eligible nga makabaton sang next round sang fuel subsidies.
Suno sa ahensya, ang tagsa ka municipal mayors ang kinahanglan magpasa tubtob bwas sang ila validated list of qualified beneficiaries para sa Pantawid Pasada program.
Nag-isyu sang Memorandum Circular 2022-046 ang DILG nga nagamandu sa LGUs nga magsubmit sang ila listahan sang tricycle driver kag operators upod ang ila complete address, electronic wallet accounts kag iban pa nga personal details.
Ang listahan ang iga-certify sang Tricycle Franchising Board kag head sang local Tricycle Operators kag Drivers Association.
Dugang pa sang ahensya, dapat siguraduhon nga ang cash assistance ang pagagamiton para lang sa fuel purchases.
Dapat man nga mag set-up ang tagsa ka lokal nga pamunuan sang Pantawid Pasada Assistance and Complaint Desk ukon hotline agud ma-akomodar ang mga concern sang mga driver.
Nahibaluan nga sa ini nga programa makabaton sang tig P6,500 ang qualified public utility vehicle drivers sang jeep, UV Express, mini buses, buses, shuttle services, taxis, tricycles kag ride-hailing services.
Madumduman nga ini ang gin-implementar sang Department of Transportation (DOTr) kag Land Transportation Franchising and Regulatory Board (LTFRB).
