ILOILO CITY- Natalana nga magabiyahe sa Saudi Arabia sa masunod nga bulan ang mga opisyales ang Department of Migrant Workers sa pagpamuno ni Secretary Susan Ople agud plantsahon ang mga detalye sap ag-proseso sang mga wala nabayaran nga suweldo sang mga OFWs sa nasambit nga pungsod.
Ini ang ginpahayag ni DMW Undersecretary Hans Cacdac kasunod sang anunsyo ni Ople sang Nobyembre 18 nga nagpangako ang gobyerno sang Saudi Arabia nga maghatag sang P30.5 billion nga wala mabayaran nga suweldo sang kapin 10,000 ka mga OFWs nga nagatrabaho sa construction firms nga nagkalaputo sang 2015 kag 2016 bangud sa paghina sang ekonomiya sang Kingdom of Saudi Arabia.
Ginhimo ang anunsyo matapos naghiwat sang bilateral meeting sanday Presidente Ferdinand Marcos Jr. kag Saudi Crown Prince Mohammed bin Salman sa sidelines sang Asia Pacific Economic Cooperation ukon APEC Summit sa Bangkok, Thailand.
Angut sini, gintukod na ang technical working group nga amo ang maga-atender sang nasambit nga butang.
