ILOILO CITY- Kasunod sang pagpanalasa sang Bagyo paeng, ginpahanumdum sang Department of Health ukon DOH ang publiko ilabi na ang mga nagapabilin sa evacuation areas kag mga lugar nga may baha nga maghalong sa posible paglapnag sang mga balatian nga dengue kag leptospirosis.
Ginpahayag ni DOH officer-in-charge Undersecretary Maria Rosario Vergeire nga nagpalapta na sila sang healthworkers sa 633 ka evacuation centers sa bilog nga pungsod kon sa diin magapatigayon sila sang screening kag konsultasyon sa mga evacuees.
Yara sa 31 million pesos nga balor sa mga bulong kag medical supplies ang napadala na sa nagkalain-lain nga mga rehiyon antis pa man manalasa ang bagyo Paeng. Partikular nga ginpadal-an ang Regions I, II, Cordillera Administrative Region, IV-A, IV-B, V, VI, VII, VIII, Caraga, Bangsamoro Autonomous Region in Muslim Mindanao kag National Capital Region.
Magluwas diri, may yara pa sang 72.8 million pesos nga balor sang mga kinahanglanon ang yara sa mga bodega sang DOH central office kag handa nga ipadala anuman nga oras kon kinahanglanon sang isa ka lugar.
