ILOILO CITY — Lapit nalang nga magsugod ang dry season ukon tig-ilinit sa pungsod suno sa state weather bureau nga PAGASA subong nga Biyernes.
Suno kay PAGASA weather specialist Benison Estareja, nagahilapit na ang pagtakop sang amihan season kag posible nga sa masunod nga semana tubtob sa ulihi nga adlaw sang Marso magasugod ang ginatawag nga warm, dry season ukon tig-ilinit sa Pilipinas.
Dugang pa sini nga padayon ang pagluya sang mabugnaw nga amihan ukon northeast monsoon nga naga-apekto nalang sa northern kag central Luzon, samtang amat-amat nga nagapalapit sa pungsod ang easterlies ukon mainit kag mapaang nga hangin halin sa Pacific Ocean.
Samtang, nagakatunaw na ang low pressure area sa nasidlangan sang Visayas nga ginabantayan sang PAGASA.
Cloud remnants ukon mga nabilin nga panganod na lang ang posible nga magpaulan sa pila ka bahin sang Visayas kag southern Luzon.
