ILOILO CITY — Ginbatak na ang fishing ban nga ginpatuman sa Calapan, Oriental Mindoro kasunod sang oil spill gikan sa naglugdang nga MT Princess Empress.
Gin-athag ni Calapan City Administrator Atty. Raymund Ussam nga gin-lift ang fishing ban matapos nga ginpahayag sang mga eksperto nga wala sang indikasyon nga ang mga isda sa lugar ang apektado sang oil spill.
Apang, ginadumilian sa gihapon ang paglangoy sa baybayon sang Barangay Navotas, Maidlang, kag Silonay.
Dugang pa ni Ussam nga magapadayon sila sa paghatag sang emergency assistance sa mga apektado nga mangingisda kag residente sa Calapan City.
Sandig sa datos sang Provincial Disaster Risk Reduction Management Office, kapin 20,540 ka pamilya sa 10 ka mga banwa ang apektado sang oil spill.
Ila karon ginatutukan ang banwa sang Pola kun sa diin 10 ka mga lugar ukon barangay ang ginapatigayunan sang shoreline cleanup operations.
