Ginkakas na sang mga author sang proposed nga Maharlika Wealth Fund (MWF) ang state pension funds nga Government Service Insurance System (GSIS) kag Social Security System (SSS) bilang mandatory contributors ukon kuhaan sang pondo sang sovereign wealth fund.
Ini ang gin-anunsyo ni House appropriations panel senior vice chairperson Stella Quimbo sang Marikina City kag isa man sa mga authors sang hagna.
Suno kay Quimbo, gindesisyunan ini matapos nga makigsapol sila sa mga economic managers lakip na ang Bangko Sentral ng Pilipinas sa diin hugot nga ginabalabagan ini ni Governor Felipe Medalla.
Ginpahayag ni Quimpo nga ang tinutuyo sang sini nga hagna ang mangita sang surplus nga pondo agud mangin investment vehicle para sa mas mataas nga kita sang government programs.
Magluwas sa GSIS kag SSS, ginkakas naman sa mandatory contributors sang MWF ang General Appropriations Act ukon national budget law.
