ILOILO CITY — Ginahaylo sang Makabayan bloc sa Kamara nga imbestigaran sang Committees on Natural Resources ang epekto sang oil spill tuga sang naglugdang nga tanker.
Madumduman nga may karga nga 800,000 litros sang industrial fuel ang MT Princess Empress sang naglugdang ini sa baybayon sang Oriental Mindoro sang nagligad nga Pebrero 28.
Nag-file ang Makabayan bloc sang House Resolution No. 869 agud imbestigaran ang amu nga insidente.
Nakasaad man sa HR 869 ang report sang fisher group nga Pamalakaya nga posible makahalit sa bullet tuna, skipjack tuna, kag seaweed farms sa Palawan kag Antique ang oil spill.
Nahibaluan nga nag-apekto na ang oil spill sa ikaayong lawas sang masobra 120 ka mga tawo suno sa Office of the Civil Defense.
Dugang pa sang environmental group nga posible mabatyagan ang “extensive damage” sang oil spill sa sulod sang pila ka dekada.
