ILOILO CITY- Ginduso ni House Deputy Minority Leader France Castro nga dapat imandu man ni Presidente Ferdinand Marcos Jr. ang pagpaiway sang pagsaka sang kontrobusyon sang mga miyembro sang Social Security System ukon SSS kag Pag-ibig Fund.
Ginhimo ni Castro ang panawagan kasunod sang direktiba ni Presidente Marcos nga ipaiway ang natalana nga pagpataas sang premium sang Philippine Health Insurance Corporation ukon Philhealth bangud sa mga ginaatubang nga kabudlayan.
Suno kay Castro nga mahimo man nga manduan sang palasyo ang Board of Directors sang SSS kag Pag-ibog nga ipaiway ang ila contribution hike bangud kinahanglanon sang mga Pilipino ang tagsa ka peso nga ila ginakita para sa kinahanglanon sang ila pamilya.
Antis ang pagpaiway, natalana kuntani nga pataasan sang Philhealth ang kontribusyon halin sa 4% pasaka sa 4.5% .
Samtang ang SSS naman umpisa sini nga Enero magapasaka man sang kontribusyon sa 14% halin sa 13% kag ang Pag-Ibig natalana man nga magapataas subong nga tuig sang konstribusyon sa 150 halin sa 100 pesos kada bulan.
