ILOILO CITY- Nakalista ang Department of Health sang kapin 3,900 ka kaso sang COVID-19 sa mga estudyante sa nagkalain-lain nga mga eskuwelahan sa bilog nga pungsod humalin sang Setyembre 1 tubtub Nobyembre 3.
Subongman, ginpahayag ni DOH officer-in-charge Maria Rosario Vergeire nga wala sang ginreport nga severe infections ukon napatay.
Suno kay Vergeire nga ang nasambit nga nalista nga mga kaso sa mga estudyante ang indi makapugong sa pagpadayon sang implementasyon sang full face-to-face classes,
Dugang pa ni Vergeire nga nagapakig-angut sila sa Department of Education natuhoy sa numero sang mga estudyante nga natapikan sang COVID-19.
Ginpahayag niya nga nagpasalig man ang Dep-Ed nga kumpletuhon sini ang reports gikan sa mga eskuwelahan kag igasumiter sa DOH.
Samtang, ginpahayag ni Dep-Ed spokesperson Michael Poa nga nangin masulhay man ang pagbalik sang full face-to-face classes sang Nobyembre 2.
Kadungan sini, ginpahayag sang Dep-Ed nga may option naman ang mga estudyante kag manunudlo kon magsuksok pa ukon indi na sang face mask bisan sa sulod sang classroom santu sa national policy.
