ILOILO CITY — Viral sa social media sang weekend ang video sang isa ka iloy nga nagapangayo sang bulig nga mabawi ang iya bata nga ila ginbaligya agud may pangbayad sa utang bangud sa iya pagka-adik sa e-sabong.
Ginapahayag nga nagadangat sa P50,000 ang una niya nga ginpangayo para sa iya bata apang naghisugot sila sang iya ka-transaksyon sa Facebook sa balor nga P45,000.
Nagkitaay ang duha sa Quezon City kun sa diin natabo ang baligyaanay sang Marso 3.
Apang pagpauli sang iloy, nagbag-o ang iya nga paminsaron gani iya liwat gintawgan ang iya nga katransaksyon apang indi na niya ini makontak.
Suno kayPhilippine National Police Women and Children Protection Center Spokesperson PCol. Joy Tomboc, lunsay may yara sang salabton sa layi ang iloy sang bata kag ang ginbaligyaan.
Dugang pa ni Tomboc, posible man nga may bayolasyon sila sa layi batok sa child trafficking bangud may yara sang bayluhanay sang kwarta nga natabo.
Nagtukod na karon ang kapulisan sang team para makaistorya ang iloy agud mahibaluan ang iban pa nga detalye sang kaso.
Ginpahanumduman man sini ang publiko nga hatagan sang importansya sang mga bata.
