ILOILO CITY- Nagpanawagan ang House Makabayan Bloc sa kongreso nga ipasar ang ila hagna nga nagahatag sang P33,000 nga bulanan nga minimum wage para sa tanan nga empleyado sang gobyerno.
Ginhimo nanday House Deputy Minority Leader France Castro sang ACT Teachers, House Asst. Minority Leader Arlene Brosas kag Kabataan Party-list Representative Raoul Manuel ang proposal sa idalum sang House Bill 6560 nga gin-file sang Disyembre 7.
Sa ila explanatory note sa hagna, ginpahayag nila nga sa idalum sang karon nga Salary Standardization law, ang lowest-paid employee ang pagahatagan lamang sang gamay nga salary increase nga P1,932 nga igahatag sa apat ka tranches ukon P483 kada bulan.
Dugang pa, ginpahayag sang proponents nga sang nakaligad nga Duterte Administration, gin-doble ang base pay sang entry-level uniformed personnel sang 2018 na nangin P29,668 halin sa P14,834 nga nagakahulugan nga may kuwarta ang gobyerno nga ibayad sa mga competent kag deserving nga mga empleyado.
