Nagdesisyon ang local government of Kalayaan Group of Islands, nga kabahin sang West Philippine Sea, nga buksan ang nasambit nga area para sa turismo.
Pinaagi sa Great Kalayaan Expedition project, tinutuyo sang Kalayaan municipal government nga himuon ang West Philippine Sea nga mangin tourist destination sa diin mangin popular ini sa fishing kag diving.
Ginpatigayon ang una nga expedition sa paglayag sang BRP Melchora Aquino, pinakadako nga vessel sang Philippine Coast Guard (PCG).
Sakay sa nasambit nga barko ang miyembro sang technical working group of Kalayaan tourism lakip na ang representatives gikan sa Palawan Provincial Tourism Office kag Palawan Council for Sustainable Development, lakip man ang game fishing kag recreational diving experts.
Suno kay Ken Hupanda, Kalayaan Municipal Tourism officer, tinutuyo sang Great Kalayaan Expedition nga buksan ang West Philippine Sea ilabi na ang Municipality of Kalayaan, agud mangin tourism resources.
Maluwas sa diving, nagatanyag man ang municipal officers nga makilala ang Kalayaan bilang primary game fishing destination sa pungsod.
