ILOILO CITY- Plano ni President Ferdinand “Bongbong” Marcos Jr. nga ibutang ang National Disaster Risk Reduction and Management Council ukon NDRRMC sa idalum sang Office of the President.
Ini ang pahayag sang Presidente may kaangtanan sa pagkomemorar sang ika-9 nga anibersaryo sang pagpanalasa sa Supertyphoon Yolanda.
Nahibaluan nga ang NDRRMC nga gintukod pinaagi sa Republic Act no. 10121 ang ginapamunuan sang Secretary of National Defense kag Vice-Chairpersons naman ang mga tiglikom sang DILG, DSWD, DOST, kag NEDA.
Samtang miyembro naman sini ang mga heads sang nagkalain-lain nga ahensya kag organisasyon.
Subongman, sa iya pagpamulong-pulong, ginpasalamatan ni Marcos ang foreign diplomatic corps sa padayon nga pagbulig sang ila mga pungsod sa pagbangon kag rehabilitasyon sang mga lugar nga naapektuhan sang Yolanda.
Nagpalab-ot man sang pagpasalamat ang Presidente sa mga non-government organizations nga naghatag gilayon sang financial aid, supply sang gatong, pagkaon, palasilungan kag construction materials pagkatapos nag-igo ang kalamidad sang Nobyembre 8, 2013.
