ILOILO CITY- Nag-alokar ang Home Development Mutual Fund ukon Pag-IBIG Fund sang P250 Billion agud gamiton sa pagpatuman sang national housing program sang gobyerno.
Ginahayag ni Pag-IBIG Fund department manager for public media affairs Jack Jacinto nga ang nasambit nga multi-billion allocation ang kabahin sang ila commitment nga suportahan ang Pambansang Pabahay para sa Pilipino Program sang Marcos Administration.
Suno kay Jacinto nga ang programa nagatuyo sa pagtukod sang one million housing Units tagsa ka tuig ukon kabug-usan nga 6 million ka housing units sa sulod sang anum ka tuig sang karon nga administrasyon
Sa sini nga national target, nagpangako ang Pag-IBIG Fund nga magatukod sanga kapin sa 708,000 ka housing units sa sulod sang anum ka tuig sa koordinasyon sang Department of Human Settlements and Urban Development ukon DHSUD.
Iya man gin-engganyo ang local government units kag accredited developers sang Pag-IBIG Fund nga mag-apply para sa programa agud makapatindug sang housing Units para sa mga miyembro sang Pag-IBIG.
Una diri, ginpahayag ni DHSUD Secretary Jose RizalinoAcuzar nga nakasugod na ang pagpatuman sang national housing priority program sa pila ka mga lugar sa pungsod sang Setyembre kon sa diin ginhiwat ang groundbreaking ceremonies sa mga key cites and municipalities kasubong sang Quezon City, Bacolod City, Roxas City, Iloilo City kag Mariveles, Bataan.
