Ginaduso ni Department of Information and Communications Technology (DICT) Secretary Ivan John Uy nga kun mahimo ipaagi sa online ang SIM card registration process.
Suno kay Uy, mabudlay kun personal mismo nga magpadulong sa registration sites bangud dagsaon ini sang madamo nga tawo.
Ginpahayag ni Uy nga ginaduso ang online nga paagi sang pagparehistro bangud sa kadamuon kag indi masarangan ang physical registration.
Ini ang ginpahayag nga ideal situation sa diin ang registration kag submission sang verifiable documents ang pagatigayunon paagi online kag kapin 144 tubtob 150 million ka cards ang iga-issue.
Nahibaluan nga sang Oktubre 10, ginpirmahan na ni President Ferdinand “Bongbong” Marcos Jr. ang Republic Act 11934 ukon SIM Registration Act, sa diin nagamando ini sa tanan nga public telecommunications entities (PTEs) ukon sa mga direct sellers sang SIM cards nga i-require sang valid identification document nga may litrato ang mga SIM card users.
