ILOILO CITY- Ginpasiguro ni Presidente Ferdinand Marcos Jr. nga mangin mahalungon ang iya administrasyon sa paggasto sang kuwarta kadungan sa pagpresentar sa iya sang Bangko Sentral ng Piulipinas ang bag-o nga mga Philippine banknotes nga may yara sang iya pirma lakip na ang bag-o nga coins nga may logo sang BSP.
Suno kay Marcos nga ang ginpaguwa nga bag-o nga polymer banknote ang mas mabakod, matinlo kag manami bilang sabat sa public health kag safety concerns bangud sa pandemya.
Ginhatagan pagtamod sang Presidente nga makasiguro ang publiko nga ang tagsa ka sentimo nga gastuhon sang gobyerno ang magakadto sa mga programa kag proyekto nga makabenepiso sa tanan nga Pilipino.
Gin-engganyo man ni Marcos ang BSP kag iban pa nga ahensya sang gobyerno nga pabaskugon ang kampanya batuk sa pagpameke sang kuwarta kag iban pa nga illegal nga aktibidad.
