ILOILO CITY- Nakabaton sang mataas nga ”approval” kag “trust” ratings sanday Presidente Ferdinand Marcos Jr. kag Vice-President Sara Duterte sa nationwide survey sang RP-Mission and Development Foundation, Inc. ukon RPMD.
Base sa “Boses ng Bayan” survey sang RPMD nga ginhimo sadtong Nobyembre 27 tubtub Disyembre 2, nagapakita nga 83% sang respondents ang nalipay sa pag-uyat sang trabaho ni Presidente Marcos Jr kag 81% naman kay VP Sara Duterte nga nagaserbe man bilang Dep-ed Secretary.
Ginhatagan man sang mataas nga trust rating ang duha nga pareho nakabaton sang 87% sanday Marcos kag Duterte.
Mataas sa tanan nga rehiyon kag socio-economic classes ang approval kag trust rating sang duha ka opisyal kon sa diin pinakamataas ang satisfaction rating ni Marcos sa Mindanao kag pinakamanubo sa Metro Manila nga 73%.
Samtang ang satisfaction rating ni VP Sara ang pinakamataas sa Mindanao nga 98% kag pinakamanubo sa Luzon nga 70%.
