ILOILO CITY- Magapatindug ang gobyerno sang mas madamo nga cold storage facilties agud indi mausik ang hulik nga isda sang mga mangingisda sa pungsod.
Ginhimo ni Presidente Ferdinand “Bongbong” Marcos Jr. sa ginhiwat nga sectoral meeting sa Malakanyang kaupod ang mga opisyal gikan sa Department of Agriculture (DA), Department of Environment and Natural Resources (DENR), Laguna Lake Development Authority, Department of Interior and Local Government (DILG) kag Cooperative Development Authority kon sa diin gintalakay ang fisheries program sang pungsod.
Suno sa presidente, madamo ang nagakausik nga isda bangud sa kakulang sang cold storage facilities.
Bangud sini, magapahamtang sang mga cold storage facilities sa mga bagsakan sang isda agud ma-preserve kag indi kinahanglan nga ihaboy bangud lub-ok na.
Pinaagi sini mabuhinan man ang kapierdihan sang mga negosyante kag magataas ang supply sang isda sa pungsod.
Suno sa presidente, plano sang gobyerno nga magpatindug sang 11 ka iban pa nga cold storage facilities sa mga siyudad sa General Santos kag Cagayan De Oro.
