ILOILO CITY — Ginguba sang Philippine Drug Enforcement Agency (PDEA) ang masobra P19.9 billion nga balor sang iligal nga druga sa Cavite, pinakadako nga nabalhag nga kantidad sang dangerous drugs board.
Suno sa PDEA, ginguba sini ang kapin 3.7 tons sang iligal nga druga nga nagabalor sang P19,965,441,929.59 subong nga Huwebes sa Integrated Waste Management, Inc. (IWMI), Barangay Aguado, Trece Martires City, Cavite.
Ang mga ginpang-guba nga druga ang nakuha gikan sa nagkalain-lain nga anti-drug operations nga ginhiwat sang PDEA kaupod ang iban pa nga law enforcement kag military units.
Suno sa ahensya, lakip sa mga ginbuba amu ang:
- 2,715,151.4251 grams sang shabu balor P18,463,029,690.54
- 306,787.0243 grams sang marijuana balor P36,814,442.92
- 407.7200 grams sang cocaine balor P2,160,916.00
- 340.8424 grams sang ecstasy balor P1,353,813.27
- 15.6000 grams sang diazepam balor P604.50
- 1.0823 grams sang nitrazepam balor P23.00 kag iban pa nga confiscated drugs
Paathag pa sang PDEA nga ang mga drug evidence ang ginguba paagi sa thermal decomposition ukon thermolysis kun sa diin ginaguba ang chemical compounds gamit ang init.
Nagpakigbahin man sa pagguba sang druga amu ang mga personnel gikan sa Department of Justice (DOJ), Department of the Interior and Local Government (DILG), local officials sang Barangay Aguado, Trece Martires City, Philippine National Police (PNP) kag iban pa nga law enforcement agencies.
