ILOILO CITY- Gin-aprobahan sang Department of Agriculture ukon DA ang pag-import sang 21,060 metric tons sang sibuyas agud pun-an ang kakulangan sang supply kag matapna ang padayon nga pagtaas sang presyo sini sa merkado.
Ginpahayag sang DA nga maga-isyu ini sang sanitary and phytosanitary imprt clearance (SPSIC) para sa importasyon sang preska nga yellow kag red onions humalin Enero 9 tubtub 13, 2023.
Ang mga licensed importers ang ginahatagan sang tubtub Enero 27, 2023 para sa shipments nga mag-abot sa pungsod.
Suno sa DA nga para sa yellow nga sibuas, 3,930 metric tons ng ginapahanugutan nga kadamuon sang iga-import samtang 17,000 metric tons naman ang pula nga sibuyas.
Katuyuan sang importasyon nga masolbar ang kakulang sang sibuyas kag mangin estable ang presyo sini kag mauntat na ang pagsaka.
