Gina-dumilian sang Bureau of Fisheries and Aquatic Resources (BFAR) ang pagbaligya sang pink salmon kag imported pampano sa mga merkado kag supermarkets.
Ginhatagan-pagtamud sang BFAR nga madugay na nga ginadumilian ang pagbaligya sang nasambit nga sahi sang isda, sa idalum sang Fisheries Administrative Order No. 195 nga gin-pirmahan sadtong tuig 1999 pa.
Base sa kasuguan, mga dalagkoan nga kompanya, mga hotel kag restaurant lang ang pwede makabaligya sang nasambit nga mga isda.
Suno sa BFAR, ini ang ila nga tikang agud buligan ang palangabuhian sang mga lokal nga mangingisda kag para kalangkagan sang publiko ang mga isda nga mahulik sa baybayon nga sakop sang pungsod Pilipinas.
“Kapag na flood natin nagkaroon ng maraming pampano at maraming salmon, hindi na natin masa stabilize presyo natin at doon po kawawa naman maliliit na mangingisda natin because hindi sila nabibigyan ng opportunity na magbenta ng local products,” suno kay Zaldy Perez, assistant director for administrative services sang BFAR.
Tubtob sa Disyembre 4 na lang ang pag-pahanugot sang pagbaligya sang imported nga pampano kag salmon sa mga merkado kag matapos ang nasambit nga petsa, pagakumpiskaron sang BFAR ang nasambit nga sahi sang isda nga ginabaligya sa gihapon sa merkado.
