ILOILO CITY — Naghingyo sang suporta si President Ferdinand “Bongbong” Marcos Jr. sa member-states sang United Nations para sa plano sini nga makakuha sang non-permanent seat sa Security Council.
Ini ang iya ginpahayag kadungan sang iya nga speech sa high level general debate sa 77th Session sang UN General Assembly.
Ginhatagan pagtamod ni Marcos ang development sa Bangsamoro Autonomous Region in Muslim Mindanao (BARMM) bilang sentro sang paghimakas sang Pilipinas nga malab-ot ang katawhayan sa pungsod.
Ginpakigbahin man sini nga nagahimo sang partnership ang Pilipinas para sa peace and development paagi sa mga dayalogo lakip na ang inter-faith kag inter-religious dialogue paagi sa Association of Southeast Asian Nations (ASEAN).
Nahibaluan nga nakasaad sa UN website nga ang United Nations Charter ang may gin-establish nga anom ka main organs sang UN, lakip na diri ang Security Council.
Sa karon, ang UN Security Council ang may lima ka mga mga permanente nga miyembro lakip na ang China, France, Russian Federation, United Kingdom, kag United States, subong man ang 10 non-permanent members nga nagaka-eleher nga may two-year terms sang General Assembly: Albania (2023), Brazil (2023), Gabon (2023), Ghana (2023), India (2022), Ireland (2022), Kenya (2022), Mexico (2022), Norway (2022), United Arab Emirates (2023).
Madumduman nga ang Pilipinas ang nangin non-permanent member sang UN Security Council sadtong: 1957, 1963, 1980 tubtob 1981, kag 2004 tubtob 2005.
