ILOILO CITY- Nagalaum si Presidente Ferdinand “Bongbong” Marcos Jr. nga magatahaw na ang tension sa West Philippine Sea kag mauntat na ang insidente sang harassment matapos ang sinapol nila ni Chinese President Xi Jinping.
Nahibaluan nga nadala man ni Marcos pabalik sa pungsod ang pila ka deals kag agreements lakip na ang kapin sa $22 billion nga balor sang investment pledges.
Suno sa iya nga ginproponer niya meeting nil ani Xi ang pagpabakod sang bilateral team nga maga-discuss sang mga isyu angut sa ginaagawan nga lugar sa South China Sea.
Ginhatagan pagtamod ni Marcos nga masami nagaluntad ang mga insidente sang harassment kag encroachment bangud sa kakulang sang komunikasyon.
Ginhinambit man sang presidente nga nag-improve na ang komunikasyon sa tunga sang Philippine Navy, Philippine Coast Guard kag sa ila tagsa ka counterparts sa China.
Samtang ginpahayag ni Marcos nga ang pagpalab-ot sang sitwasyon sang mga mangingisda nga Pilipino kay Xi ang nagapakita nga ang ila kahimtangan ang kalakip sa mga prioridad sang gobyerno.
Gindugang sini nga naghisugot ang duha ka bahin nga mahimo na makapangisda ang mga Filipino sa South China Sea.
