Presyo sang ulutanon,  magaumpisa na sa pagnubo bangud sa harvest season sang sibuyas kag pagnubo sang presyo sang abono

ILOILO CITY- Magaumpisa na sa pagnubo ang presyo sang mga utanon sa masunod nga pila ka semana bangud sa harvest season sang sibuyas subong nga Enero kag subong man sa ginalauman nga pagnubo sang presyo sang abono suno sa isa ka grupo sang mga mangunguma.

Nahibaluan nga sang Disyembre, nagdasig ang inflation sa 8.1% bangud gid lamang sa mataas nga presyo sang pagkaon ilabi na sang mga ulutanon lakip na ang sibuyas.

Nagtaas sa 32.4% ang inflation sa utanon sang Disyembre nga pinakamataas humalin sang Pebrero 1999 base sa data sang gobyerno.

Suno naman kay SINAG Chairman Rosendo So nga nag-umpisa naman sa pagnubo ang presyo sang abono gikan sa mataas nga presyo sang 2022 nga naglab-ot sa P2,500 gikan sa P800 kada-25 kg. bag.