ILOILO CITY — Ginhatagan sang lima ka adlaw nga ultimatum sang House panel si 3rd District Negros Oriental Rep. Arnolfo “Arnie” Teves agud nga magpaathag sa indi otorisado nga pagpalawig sang ‘leave of absence’ sini.
Suno kay COOP NATCCO Rep. Felimon Espares, Chairman sang House Committee on Ethics, nadesisyunan sa pagsapol sang komite nga hatagan sang lima ka adlaw nga ultimatum si Teves agud magpaathag.
Nahibaluan nga sang Miyerkules ginsuguran na sang komite ni Espares ang pagtalakay sa kaso ni Teves matapos nga mag-expire ang iya nga travel authority halin Pebrero 28 tubtob Marso 9 sang nagbakasyon ini sa Estados Unidos agud magpa-stem cell.
Ginhatagan pagtamod ni Espares nga naka-sentro karon sa indi otorisado nga pagpalawig sang ‘leave of absence’ ni Teves ang ginatalakay sang ila nga komite.
Ginalauman naman ni Espares nga magapauli sa pungsod si Teves kag atubangon ang iya nga kaso.
Si Teves ang ginatudlo mastermind sa pagpatay kay Negros Oriental Gov. Roel Degamo nga ginluthang samtang nagapanagtag ini sang ayuda sa iya mga pumuluyo sa iya balay sa Pamplona, Negros Oriental sang Marso 4.
Sa amu nga insidente, napatay si Degamo kag ang walo pa ka sibilyan samtang 17 naman ang napilasan.
